ഓട്ടവ : കാനഡയിലെ വാർഷിക പണപ്പെരുപ്പ നിരക്ക് ജൂലൈയിലെ 3.3 ശതമാനത്തിൽ നിന്ന് ഓഗസ്റ്റിൽ നാല് ശതമാനമായി ഉയർന്നതായി സ്റ്റാറ്റിസ്റ്റിക്സ് കാനഡ. ഗ്യാസ് വിലയിലെ വർധനവാണ് പണപ്പെരുപ്പത്തിന്റെ ഈ കുതിച്ചുചാട്ടത്തിന് കാരണമെന്നും ഫെഡറൽ ഏജൻസി വ്യക്തമാക്കി.
വാർഷികാടിസ്ഥാനത്തിൽ വിലവളർച്ച ത്വരിതപ്പെടുത്തിയെങ്കിലും, യാത്രാ ടൂറുകൾക്കും വിമാന ഗതാഗതത്തിനുമുള്ള നിരക്കുകൾ കുറഞ്ഞതിനാൽ മാസംതോറും വിലകൾ സാവധാനത്തിൽ ഉയർന്നതായി സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്തു.
അതേസമയം, ജൂലൈ മുതൽ ഓഗസ്റ്റ് വരെയുള്ള കാലയളവിൽ പലചരക്ക് സാധനങ്ങളുടെ വില 0.4 ശതമാനം കുറഞ്ഞു. എന്നാൽ, പലചരക്ക് വില ഒരു വർഷം മുമ്പുള്ളതിനേക്കാൾ 6.9 ശതമാനം ഉയർന്നു.
2021 മാർച്ചിന് ശേഷം ആദ്യമായി കാനഡയുടെ വാർഷിക പണപ്പെരുപ്പ നിരക്ക് ജൂണിൽ വാർഷികാടിസ്ഥാനത്തിൽ 2.8 ശതമാനമായി കുറഞ്ഞിരുന്നു. ഇത് ബാങ്ക് ഓഫ് കാനഡയുടെ ലക്ഷ്യമായ ഒന്ന് മുതൽ മൂന്ന് ശതമാനം വരെ എത്തി. എന്നാൽ, ജൂലൈയിൽ പണപ്പെരുപ്പ നിരക്ക് വീണ്ടും ഉയർന്ന് 3.3 ശതമാനമായി.
തുടർച്ചയായ രണ്ടു മാസത്തെ പലിശ നിരക്ക് വർധനയ്ക്ക് ശേഷം ഈ മാസം ആദ്യം ബാങ്ക് ഓഫ് കാനഡ നിരക്ക് അഞ്ച് ശതമാനമായി നിലനിർത്തിയിരുന്നു. എന്നാൽ, ആവശ്യമെങ്കിൽ ഇനിയും നിരക്ക് വർധന നടപ്പിലാക്കുമെന്ന് ബാങ്ക് ഓഫ് കാനഡ വ്യക്തമാക്കിയിട്ടുണ്ട്.
