95ാമത് ഓസ്കർ നോമിനേഷനിൽ ഇടം നേടി രാജമൗലി ചിത്രം ആർആര്‍ആറിലെ ‘നാട്ട് നാട്ട്’. ഒറിജിനൽ സോങ് കാറ്റഗറിയിലാണ് നാട്ടു നാട്ടു ഇടം നേടിയത്. ഗോൾഡൻ ഗ്ലോബിൽ മികച്ച ഒറിജനല്‍ സോങിനുള്ള പുരസ്കാരം കീരവാണി ഈണം നൽകിയ നാട്ടു നാട്ടുവിനെ തേടിയെത്തിയിരുന്നു. അതേ സമയം മികച്ച വിദേശ ഭാഷ ചിത്രങ്ങളുടെ പട്ടികയിൽ ഇടം നേടാൻ ആർആർആറിനായില്ല.
ഡോക്യുമെന്ററി ഷോർട്ട് ഫിലിം വിഭാഗത്തിൽ ഇന്ത്യയിൽ നിന്നുള്ള ദ് എലിഫന്റ് വിൻപെറേഴ്സ് എന്ന ഡോക്യുമെന്ററി ഇടംനേടി. എഡ്വാർഡ് ബെർഗെർ സംവിധാനം ചെയ്ത ജർമൻ വാർ സിനിമയായ ഓൾ ക്വയറ്റ് ഓഫ് ദ് വെസ്റ്റേൺ ഫ്രണ്ട്, ഡാനിയൽസ് (ഡാനിയൽ ക്വാൻ, ഡാനിയൽ ഷൈനേർട്) സംവിധാനം ചെയ്ത എ‌വ്‌രിതിങ് എവ്‌രിവെയർ ഓൾ അറ്റ് വൺസ്, മാർട്ടിൻ മക്ഡൊണാഗ് ഒരുക്കിയ ദ് ബാൻഷീസ് ഓഫ് ഇനിഷെറിൻ എന്നിവയാണ് ഏറ്റവും കൂടുതൽ നോമിനേഷൻസ് നേടിയ സിനിമകൾ.
രാജമൗലിയുടെ കഴിഞ്ഞ വർഷത്തെ ഇതിഹാസ ചിത്രം ആണ് ആർആർആർ രാംചരണും ജൂനിയർ എൻടിആറും പ്രധാന വേഷങ്ങളിൽ അഭിനയിച്ച ഈ ചിത്രം സ്വാതന്ത്ര്യ സമര സേനാനികളായ സീതാരാമ രാജുവിന്റെയും കൊമരം ഭീമിന്റെയും ജീവിതത്തെയും സൗഹൃദത്തെയും ചുറ്റിപ്പറ്റിയാണ്. കഴിഞ്ഞ വർഷം മാർച്ചിൽ റിലീസ് ചെയ്ത ചിത്രം ബ്ലോക്ക്ബസ്റ്റർ ഹിറ്റായി മാറി.
ബോക്‌സ് ഓഫീസിൽ മികച്ച പ്രതികരണമാണ് ആർആർആർ ചിത്രത്തിനു ലഭിച്ചത്. ചിത്രം ലോകമെമ്പാടും 1100 കോടിയിലധികം കളക്ഷൻ നേടി. നിലവിൽ ആർആർആർ സിനിമ ലോകമെമ്പാടും അവാർഡുകൾ നേടിയിട്ടുണ്ട്. ലോകത്തിലെ ഏറ്റവും ഉയർന്ന അവാർഡുകളിലൊന്നായ ഗോൾഡൻ ഗ്ലോബ് അവാർഡിൽ, ആർആര്‍ആറിന്റെ നാട്ടു നാട്ടു ഗാനം മികച്ച ഗാനത്തിനുള്ള അവാർഡും നേടി. ഇതിന് തൊട്ടുപിന്നാലെയാണ് ആർആർആർ ഓസ്കാർ നോമിനേഷൻ നേടിയത്.
